ការជជែកដេញដោលគ្នាលើដំបូង រវាងបេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ និងលោកស្រី ហ៊ីឡារី គ្លីនតុន នៃបក្សប្រជាធិបតេយ្យនឹងត្រូវរៀបចំឡើងនៅយប់ថ្ងៃចន្ទ ទី២៦កញ្ញា (ម៉ោងអាមេរិក) ។ ប្រធានបទសំខាន់បីដែលនឹងត្រូវពិភាក្សាមាន«ទិសដៅអាមេរិក, ការឈានទៅសម្រេចបាននូវវិបុលភាព និង ការរក្សាសុវត្ថិភាពអាមេរិក»។
បេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ និងបេក្ខជនបក្សប្រជាធិបតេយ្យលោកស្រី ហ៊ីឡារី គ្លីនតុន នឹងចាប់ផ្តើមជួបជជែកដេញដោលទល់មុខគ្នាជាលើកដំបូងនៅថ្ងៃចន្ទទី ២៦កញ្ញា(ម៉ោងអាមេរិក)។ កម្មវិធីនេះនឹងត្រូវរៀបចំឡើងនៅសាកលវិទ្យាល័យ Hofstra University នាទីក្រុងHempstead ហើយការជែកពិភាក្សាមានរយៈពេល៩០នាទីដោយចាប់ផ្តើមនៅម៉ោង ៩យប់។
ការជជែកដេញដោលលើកដំបូងនេះត្រូវរៀបចំឡើងប្រហែលជា៦សប្តាហ៍ប៉ុណ្ណោះ មុនការបោះឆ្នោតមកដល់។ ហើយអ្វីដែលគួរឲ្យចាប់អារម្មណ៍នោះ គឺរបាយការណ៍ស្ទង់មតិទូទាំងប្រទេសដែលចុះផ្សាយដោយសារព័ត៌មាន ABC បង្ហាញថា លោកស្រី ហ៊ីឡារី គ្លីនតុន នាំមុខលោក ដូណាល់ ត្រាំ ត្រឹមតែ ២ ភាគរយប៉ុណ្ណោះ។ ដែលនេះមានន័យថា បេក្ខជនទាំងពីរកំពុងតែប្រកៀកប្រកិតគ្នាខ្លាំងមែនទែន។
-ប្រធានបទនៃការជជែកដេញដោលលើកទី១
ត្រឡប់មកវិញ ប្រធានបទនៃការជជែកដេញដោលគ្នាគឺមានបីធំៗក្នុងនោះមាន «ទិសដៅអាមេរិក, ការឈានទៅសម្រេចបាននូវវិបុលភាព និងធ្វើយ៉ាងណារក្សាសុវត្ថិភាពអាមេរិក»។ ហើយអ្នកសម្របសម្រួលនៃការជជែកដេញដោល រួមទាំងចោទជាសំណួរចំពោះបេក្ខជនផងនោះ គឺអ្នកសារព័ត៌មាន NBC លោក Lester Holt។
-ហេតុអ្វីកម្មវិធីនេះសំខាន់?
ជារួម ការជជែកដេញដោលរវាងបេក្ខជនប្រធានាធិបតីជាពេលវេលាសំខាន់បំផុតមួយសម្រាប់បេក្ខជនទាំងពីរបញ្ចេញសមត្ថភាពដោយកំណត់គោលនយោបាយ និងយុទ្ធសាស្ត្រនានាក្នុងការទាក់ទាញអ្នកបោះឆ្នោត។ វាខុសពីការជួបជុំយុទ្ធនាការឃោសនាធម្មតា ព្រោះប្រជាជនច្រើនបំផុតនឹងចំណាយពេលវេលាតាមដានការជជែកដេញដោលគ្នានេះ។
លោក ដូណាល់ ត្រាំ និងលោកស្រី ហ៊ីឡារី គ្លីនតុន នឹងប្រើប្រាស់ពេលវេលានេះដើម្បីបញ្ចុះបញ្ចូលនិងទាញការគាំទ្រពីអ្នកបោះឆ្នោតដែលមិនទាន់សម្រេចចិត្តត្រឹមត្រូវ។
-ថ្ងៃអង្គារទី ២៧ កញ្ញា ការចុះឈ្មោះបោះឆ្នោតថ្នាក់ជាតិចាប់ផ្តើម
រឿងសំខាន់មួយទៀតគឺ នៅថ្ងៃអង្គារទី ២៧កញ្ញា ក្រោយថ្ងៃជជែកដេញដោលមួយថ្ងៃ ជាថ្ងៃចុះឈ្មោះបោះឆ្នោតជាតិនៅអាមេរិក។ វាជាពេលដែលប្រជាជនអាមេរិកចាប់ផ្តើមចុះឈ្មោះបោះឆ្នោតនៅទូទាំងប្រទេស។
-ការជជែកដេញរវាងបេក្ខជនអនុប្រធានាធិបតី Mike Pence និងលោក Tim Kein
ចំណែកថ្ងៃ ៤តុលា កម្មវិធីជជែកដេញដោលមួយទៀតរវាងបេក្ខជនប្រធាធិបតីអាមេរិកលោក Tim Kein មកពីបក្សប្រជាធិបតេយ្យនិងលោក Mike Pence ដែលជាបេក្ខជនអនុប្រធានាធិបតីបក្សសាធារណរដ្ឋ ។ កម្មវិធីនេះនឹងត្រូវរៀបចំឡើងនៅសាកលវិទ្យាល័យ Longwood នៃរដ្ឋ Virginia។
-ការជជែកដេញដោលរវាង ដូណាល់ ត្រាំ និងហ៊ីឡារី លើកទី ២ និងលើកទី ៣
លោក ដូណាល់ ត្រាំ និងលោកស្រី ហ៊ីឡារី គ្លីនតុន នឹងជួបគ្នាក្នុងការជជែកដេញដោលបន្ទាប់នៅថ្ងៃ អាទិត្យ ទី ៩ តុលា ខាងមុខទៀត។ កម្មវិធីពិសេសនេះនឹងត្រូវរៀបចំឡើងនៅសាកលវិទ្យាល័យ Washington នៅក្រុង St. Louis នារដ្ឋ Missouri។វេទិកាជជែកដេញដោលលើកទី ២នេះ នឹងផ្តល់ឱកាសឲ្យអ្នកចូលរួមសួរសំណួរ បេក្ខជនបានពាក់កណ្តាល ហើយសំណួរពាក់កណ្តាលទៀតនឹងត្រូវសួរដោយអ្នកសម្របសម្រួល។
ចំណែកជំនួបលើកទី ៣ នឹងត្រូវរៀបចំឡើងនៅថ្ងៃ ១៩កញ្ញា។ វេទិកានេះនឹងត្រូវធ្វើឡើងនៅសាកលវិទ្យាល័យ Nevada នៃក្រុង Las Vegas ដែលស្ថិតនៅរដ្ឋ Nevada។ កម្មវិធីនេះនឹងត្រូវប្រារព្ធឡើងដោយយកគម្រូតាមការជជែកដេញដោលលើកទីមួយ៕